سهود ومهود ...

#1 23-Jan-2012, 09:18 PM

تعبت اقول لضيقتي سهود ومهود
اليا متى هالعذر بيكون عذري
البارحة يوم اكثر العالم رقود
عادت علي اللي تجي منين مدري
الضيقة اللي كل ماراحت تعود
مكانها مابين قلبي وصدري
ناسٍ تنام مدهنة في دهن عود
وناسٍ تنام مدهنة بزيت مقري
لاواهني اللي حلالة من الذود
تسعين وضحى كل ماضاق يسري
يسج معها كل ماهبت النود
يتبع مسيل السيل في القاع يجري
ماهوب مثلي من اقرب الناس مجحود
الله يسامح من طعني بظهري
من راح ماكنه على القاع موجود
مايدري انه اول اسباب كسري
كل ماطرالي قلت من قلت الفود
ياليت منهو راح ماعاد يطري
لو تستحي من فعلها ايامي السود
كان استحت مبطي ولا طال صبري
قدمت بالموجود لخاطر الجود
لين التفت ولابقى شي حدري
عطيت من عمري ولا شفت مردود
ياللأسف للناس ضيعت عمري
واذا افرحوا واجد على طيحة العود
هذا دليل انه فعل شي يغري
بوقف لحالي واتبع الطيب والزود
اشره علي ان صغر الوقت كبري
ماني على بعض المخاليق محدود
اموت مانزَلت للناس قدري
/
\
/
\

اعطيكم سر من اسراراي هالقصيد اعشقها وحافظها عن ظهر قلب
واستشهد بابياتها حسب المناسبة

وعلى فكرة مال امها دخل بموضوعي
ولابالعنوان لكن شطحه من شطحاتي الي عودتكم عليها

اولة البارح الشايب متمغط بالمجلس وكنت جالس اسولف مع واحد
من العيال واقوله احب التركين يطلعون عل ائبري مازينهم

ماشوف الي توه بيغفي نفض نفسه وقال وش هالهرجه ياولد
طبعا انا كالعاده مفهي وفاك الخشه وش السالفه

؟!
هو كان 2000 سؤال في الثانيه شويه وهذي اخرتها انا تسود وجهي
وتخليني سالفه يحكون بها المسلمين ماعرفت اربي

وانا مادري
وش خطاي الي خلى الشايب يتمنى يقطعني ويحطني بكيس اسود
للزبالة

وناظرت حولي الشعب كله فهم وضحك الا انا قلت للشايب
وش بتسوي اجل لو دريت اني مفكر اروح لمهم بالاجازة باذن الله
قال تخسي الا انت

>>محشوم القارىء .. وتفلت علي وده يحوس مريري
لوما تفل ابليس وثنوه الربع عن ماراد ان يفعله بي ..
تالي همس لي واحد وش فهم الوالد الله يصلحه

عاد انا اغتنمت الفرصه
جوزوني اجل دامكم خايفين مني بهالشكل ولاابي الا تركيه

مزينهم يردون الروح
طبعا خافوا ضغط الشايب يشلل طلعوني من المجلس لاني مطول ارفع ضغطه
مخليني بدون عرس وهو مكيف مريح باله جابنا ويحسب مهمته انتهت هنا

\
دامنا في طاري تركيا وانا فاصل ومن افصل يطلع الحكي

في سالفه ثاني
ننتقل اليها في البرقراف التالي

---> مو بس انت تحكي انقلش يالي في بالي

كنت اتمشى باليوتيوب وقريت عبره الي مايعرف ابراهيم تاتلس انصحه يروح
يموت

وانا مستحيل اموت للسبب المذكور انفا لم اتزوج

طبعا بحثت عنه
حنا عندنا محمد عبده بالوطن العربي ----> ماحب محمد عبده
وبتركيا عندهم ابراهيم تاتلس شي مقدس يعني بو الطرب الاصيل
كان يحب وحده وخانته وحاول ابوها يقتله

البليه اني سمعت اغانيه
صراحه صوت يدوخ حده جبار بس خايف من الاثم والله مافهم وش يقولون
لكن صوت حلو كنت بحط اغنيه له بس تحسفت مابي ذنوب

--->دلاخه
خشته شبت عليها تشبه خشة صدام حسين

طلع من نفس المنطقه
الي انولد فيها صدام ولهم نسب معه

سبحان الله كيف عرفت هالكم الهائل
عن هالادمي من خلال معلومه من نت

لكن اشهد بالله ان التركيات مزاين
ليت من ياخذ 4 في ذمته منهن وجه حسن يفتح نفس متى يسمحون نعرس منهم
بسرعه كان كل شهر لي 4 نسوان اتزوج واطلق

بعيدا عن الاستهبال ---->

اصبح اليوتيوب ومحطات التواصل الاجتماعي مكان يرتاده كل من له غاية
يريد ان يوصلها بغض النظر عن كونها مفيدة او ضارة للمتلقي .. الاهم
ان يصل صاحب الغاية الى هدفه .. وكلكم تدرون اغلب الثورات والبلا
ماجاء الا من هالاماكن .. وصارت لها نتائج وعواقب لايمكن اننا نستهين بها
ولا بالطريقه الى وصلتنا لهالنتائج ..!!
ولاأعني بكلامي أني أهمش دور هالمواقع او ابخسها حقها لا لها ايجابيات
مستحيل ننكرها .. لكن الي أثار فضولي جدا فئه من الناس استمالة الناس في
البداية واستقطبتهم من خلال فتح قنوات لهم تتحدث عن هموم وقضايا المجتمع
باسلوب فكاهي وساخر تقبلتها الناس واصبحت متابعه بشغف لها .. وظُن بهم
خيرا وانا منهم .. بعد ماتسيدوا وظهرت هيمنتهم واصبحوا مثال يقتدى به من قبل
الناس من خلال التعليقات اوالحديث باسلوب هؤلاء الموضوع ابعد من كذا
اصبحوا مصادر مقدسه لايقبل نقد مايقدم لثقه الناس في مصداقيتهم !!
مؤخرا وجدت ان الموضوع بدى يصل الي انتقاد احكام الدين وقناعات
اسلاميه لايمكن تتغير والاشاره بالتلميح والصريح الى بعض العلماء
والمشائخ وانقادهم لتذكير الناس بما ينفعهم .. !! الموضوع جدا ازعجني
خصوصا رايت الثير من ردود مؤيدة لمهاترات هولاء .. !!
الامثله كثيره لكن لايسعني المقام ان اذكرها .. حبيت اناقشكم واشوف
ارائكم واطلاعكم فيما يتعلق بهالموضوع الي اعتبره جدا حساس ..

ودعواتي لكل واحد يرد بحرمه بجمال تركي الا واحد يعرف نفسه

24-Jan-2012, 05:05 PM

>>> مافهمت وش تبي تبي تعرس والا اتنقد على اليوتيوب

المهم عرس منت بماخذ الا من اللي انت تعيب على ركبهم

وعلى طاري اليوتيوب تدري وش اتابع اللحين ؟؟

مسلسلك توق اللي ماعاد كملته يالسيبااال

24-Jan-2012, 05:29 PM

ولاراح تفهمين ياخوك
انتي قشري بصل وقطعي توميتو
اما على العرس يابري حالي برياه هذي
اخرتها سيباله وحده مثلك تهزا بي اخس واعقب
يالذا الحال

وتوق هونت دبلوا كبدي هالحين جالس
ارفع انمي يجنن قصته رومانسيه بيعجبك يالدلخ
والنقاش نشوف حد اخر يفهم علي

24-Jan-2012, 07:19 PM

يبقالك قلب ياآآآآآآآآآآآآآآآآآكبرهـ

يآآآآآآآآآليل ..

ما اقول الا الله يعين اللي حولك ..

لي عوده بمزاج رايق ..

24-Jan-2012, 07:44 PM

اييييييييييييييييييييييييييه

جبتها على الجرح يا سكورى

وما ادرى وش الحل مع هالشيبان الله يطول بعمراهم

عليهم طلعات مالها سنع ...واحمد ربك اقلها شايبك اعتقد انك بتروح للتركيا عشان هالشقران

وصدقني لو مو خابرن عليك شي ما اعتقد بهالشي

بس انا شايبي محطمني مره واحده كل كلمه والثانيه قايلن لي انت ديك

.....

تدري وش المشكله يا سكورى

المشكله العالم صارت ما تفكر وما ادري هالشي جديد او قديم

تحاول تقنعه بالمنطق والعقل وما يستجيب لك والسبب فلان قال كذا كآن افلان معصوم عن الخطا و كلامه قرآن كريم.

والادهي والامر انهم يتناسون ان الاعلام من اخطر اسلحه العصر و يستخدم بقوه هالايام لتدليس الحقائق

..

في النهايه سلم لي علي الشايب وحب خشمه

وقال له اني بروح معك وهذي وجهي ان ما سحب جوازك وسوئ لك منع سفر

25-Jan-2012, 10:51 PM

في انتظارك تفوق

25-Jan-2012, 11:06 PM


	اييييييييييييييييييييييييييه جبتها على الجرح يا سكورى

ماتفق معك الا بشيء يعل القلب ليتني على اتفق معك
اننا تجار او راعين منصب مرموق لكن الشكوى لله
نعزك لو ماوراك الا الفلس نغديك ونعشيك على حسابنا

---->جحدك


	وما ادرى وش الحل مع هالشيبان الله يطول بعمراهم


	عليهم طلعات مالها سنع ...واحمد ربك اقلها شايبك اعتقد انك بتروح للتركيا عشان هالشقران

طول الله عمرك الوالد حسبني
مطيح مع الحلاقين التركين يعني تفكير شاطح بقوووه

ياليته مع شقراوات ماحسيت ان كرامتي انهانت بهالشكل


	وصدقني لو مو خابرن عليك شي ما اعتقد بهالشي

هو ماشك بي الا يوم شاف اني مخاويك وشاف حركاتك معي

---> علشان تعرف كيف تشوه السمعه


	بس انا شايبي محطمني مره واحده كل كلمه والثانيه قايلن لي انت ديك

لاتزعل قله كوكوكوكووووووو

وثق بي ماراح يعيدها نوبه ثانيه ابد


	تدري وش المشكله يا سكورى


	المشكله العالم صارت ما تفكر وما ادري هالشي جديد او قديم تحاول تقنعه بالمنطق والعقل وما يستجيب لك والسبب فلان قال كذا كآن افلان معصوم عن الخطا و كلامه قرآن كريم.

هذا الي قاهرني اي شي لابد نفكر به بعقل ونرده لكتاب الله وسنة رسوله
مو نحكم اقوال الناس وليتها ناس تستاهل ناس منحطه وتوجه الاخرين
الى قيم وعادات تخرجهم من المله !!


	والادهي والامر انهم يتناسون ان الاعلام من اخطر اسلحه العصر و يستخدم بقوه هالايام لتدليس الحقائق

صادق واكبر دليل قناه العالم وش سوت غبائها كمثال على انحطاط
المستوى الاعلامي في الطرح الله المستعان بس.
..


	في النهايه سلم لي علي الشايب وحب خشمه


	وقال له اني بروح معك وهذي وجهي ان ما سحب جوازك وسوئ لك منع سفر

تصدق ان ماعندي جواز !!!!!
واني يوم جيت بطلع كني بسوي جريمه شنعاء
ظنك وش السبب؟؟؟

27-Jan-2012, 07:24 AM

Sakura
الشعور بالاستقلالية شيئ جميل وتحمل المسؤولية شيئ عظيم يولد لنا الشعور بالخوف اتجاه هذه المسؤولية ولكن فوق كل هذا الشعور بالراحة والاطمئنان وحياة العزوبية لا تستحق ان يقال انها حياة
فحياتك في حنان زوجة وبسمة طفل واستقلالية عن حياة التطفل وصدق المولى حين قال :
(المال والبنون زينة حياة الدنيا) فما اجمل حياة عازب حينما تسكن حياته زوجة صالحة تقر عينه وولد صالح يحن ويعطف عليه يلاعبهم ويتمازح معهم متناسيا اعباء الحياة ومتاعب الشغل .. الله يرزقك يااارب باللي تمنى ..

اما بالنسبة لموضوعك الثاني :
هناك العديد من المواقع الجيده التي تستخدم لهدف غير هادف بما تعرض وتجد اقبال كبير من المشاهدين عليها اعتقد هذا تخلف من المشاهدين ليس من اليوتيوب وللاسف هذا اللي حااصل لكن وين المسؤلين عن هذه الحمااقات الي صاايره لا نستطيع ان نجتثها من اصولها ولأن ضعاف النفوس هم من يقفون خلف هذه السخافات لان وضعهم هو الاقوى في هذه الحاله وإندثار معالم الإنسانية كل سواء فكرية أو حسية أو غيرها غَباء اجتاح مواقعنا وعُقولِنا وَالبقَيه لا تُحكى ولا تُقال... استنبط في هذه الحاله مقولة :
لكلّ داءٍ دَواءٌ يُستطبّ بهِ // إلا الحَماقةَ أَعيتْ مَنْ يُداويها
قَالها الشّاعرُ القَديمُ ذاتَ يوم
قَالها حينما أدراكَ حَقّاً أنّ الحَماقةَ تُعيي مَنْ يُداويها !
مَاعرضته الآن حِكايةُ لو سَمِعَ بِها ابن الجَوزيّ لأوردَها
في كِتابهِ " أخبار الحَمقى والمُغفلين "
سيدي Sakura
قَدْ قالوا في تُراثنا القَديم " رزق الهبل على المَجانين "
وأكادُ أجْزمُ أنّهم مُحقّونَ في قَولهم
فَمْن شَاهدَ هذه السخافات وغيرها مِن المواقع التي تَسيرُ
عَلى ذاتِ النّهج يُدْرِكُ صِحّةَ هَذهِ المَقولة

اعتذر سيدي عن الاطاله

بكل ماخطه حرفك
وبكل ماجمعه فكرك تبقى مميز
ثق بأني أستمتعت كثيرا من بين السطور
لك كل الاحترام والود

05-Feb-2012, 08:50 PM

يبي لي ارد عليك بعد مايتعدل المزاج
راجع لك يابطله

أدوات الموضوع
مشاهدة صفحة طباعة الموضوع أرسل هذا الموضوع إلى صديق

الإهداءات

سهود ومهود ...

بِعَيْنِ الَنَقْدِ سُطًوْرٌ تُتُلَىْ.